ដោយ ហង្ស សាវយុត
2010-10-09
សមាគមថៃមួយចំនួន ដែលមានអ្នកដឹកនាំជាបញ្ញវន្ត និងព្រះសង្ឃខ្លះ ដែលនៅចេះនិយាយភាសាខ្មែរ បានជួបប្រជុំគ្នាជាមួយអង្គការក្រៅរដ្ឋាភិបាលខ្មែរមួយ នៅក្នុងខេត្តសុរិន្ទ ប្រទេសថៃ កាលពីល្ងាចថ្ងៃសុក្រ ទី៨ ខែតុលា ដើម្បីស្វែងរកជំនួយខាងគ្រូបង្រៀនភាសាខ្មែរជាច្រើនរូប ដែលគេកំពុងត្រូវការចាំបាច់ ឲ្យទៅស្នាក់នៅស្រុកថៃ ជួយបង្រៀនអក្សរខ្មែរ ដល់ប្រជាពលរដ្ឋថៃជាច្រើនក្នុងខេត្តសុរិន្ទ។
លោក ប៊ុនរឿង គុជម៉ា ជាប្រធានគម្រោងរៀបចំឲ្យមានការបង្រៀនអក្សរខ្មែរនៅខេត្តសុរិន្ទ ប្រទេសថៃ បានមានប្រសាសន៍តាមទូរស័ព្ទ កាលពីយប់ថ្ងៃទី៨ ខែតុលាថា ពេលនេះគម្រោងបង្រៀនអក្សរខ្មែរបានចេញដំណើរហើយ ដោយលោកកំពុងចាប់ផ្ដើមរៀបចំកម្មវិធីថ្នាក់ទី១ ទី២ ទី៣ ផ្នែកអក្សរខ្មែរ ហើយនឹងចាប់ផ្ដើមយកគ្រូជនជាតិថៃពីតាមសាលាខ្លះជាបង្គោល មកបង្រៀនអក្សរខ្មែរ ដើម្បីឲ្យគេយកចំណេះទៅបង្រៀនសិស្សជាច្រើននៅតាមសាលាផង ៖ «គម្រោងការនេះយើងឈានទៅទំនាក់ទំនងជាមួយខ្មែរ។ នៅថ្ងៃទី១១ នេះ ខ្ញុំនឹងធ្វើដំណើរទៅជួបលោកចៅហ្វាយខេត្តរងឧត្តរមានជ័យ ដើម្បីយើងនឹងធ្វើ (M.O.U) ជាមួយគ្នា អាចនឹងទៅសុំគ្រូពីឧត្តរមានជ័យមកជួយបង្រៀនអក្សរខ្មែរនៅនឹងស្រុកសុរិន្ទ។ មិនត្រឹមតែខេត្តឧត្តរមានជ័យទេខ្ញុំនឹងទៅសៀមរាបផង ហើយនឹងទៅជួបមន្ទីរអប់រំខេត្តសៀមរាប ដើម្បីយើងទំនាក់ទំនងគ្នាខាងភាសា និងវប្បធម៌ផង»។
លោក ឆាគ្រី សិរីសុថារ៉ានុន ប្រធានសមាគមមិត្តភាពថៃ-កម្ពុជា ប្រចាំខេត្តសុរិន្ទបានចាត់ទុកថា ជនជាតិថៃភាគច្រើនដែលកំពុងរស់នៅខេត្តសុរិន្ទ គឺជាតំណពូជពង្សកូនចៅខ្មែរ ដែលនៅតែចេះនិយាយភាសាខ្មែរ ប៉ុន្តែពួកគេមិនចេះអក្សរខ្មែរទៀតទេ។ លោកបានមានប្រសាសន៍ថា លោកចង់ឲ្យប្រជាពលរដ្ឋខេត្តសុរិន្ទបានចេះអក្សរខ្មែរឡើងវិញ ដើម្បីទាក់ទងគ្នាជាមួយខ្មែរបានកាន់តែច្រើនឡើង ក្នុងគោលបំណងឆ្ពោះទៅរកការយល់ដឹងពីគ្នាទៅវិញទៅមក ផ្នែកសិល្បៈ និងវប្បធម៌ជាដើម។ លោក ឆាគ្រី បានឲ្យដឹងថា ការចាប់ផ្ដើមបង្រៀនអក្សរខ្មែរនៅខេត្តសុរិន្ទនោះ គឺជាគោលការណ៍របស់រដ្ឋាភិបាលថៃ ដែលឧបត្ថម្ភឲ្យពលរដ្ឋថៃបានរៀនភាសានៃជនជាតិសមាគមអាស៊ី-អាគ្នេយ៍ ដែលហៅកាត់ថាអាស៊ាននោះ។
ទោះយ៉ាងណា មន្ត្រីខ្មែរនៅមិនទាន់សម្រេចចិត្តយ៉ាងណានៅឡើយ ដើម្បីឆ្លើយតបនឹងក្រុមសមាគមថៃខេត្តសុរិន្ទ ដែលត្រូវការជំនួយផ្នែកគ្រូបង្រៀនភាសាខ្មែរនោះ។
លោក អ៊ឹង វ៉ន អភិបាលរងខេត្តឧត្តរមានជ័យ បានមានប្រសាសន៍ថា លោកបានដឹងថាសមាគមថៃនៅខេត្តសុរិន្ទ ត្រូវការស្នើសុំគ្រូបង្រៀនពីខេត្តរបស់លោកយកទៅបង្រៀនអក្សរខ្មែរ ប៉ុន្តែមិនអាចធ្វើសេចក្ដីសម្រេចចិត្តត្រឹមថ្នាក់លោកបានទេ ចំពោះបញ្ហានេះ ៖ «បើគ្រូស្ម័គ្រចិត្ត គេទៅក្រៅផ្លូវការអីអាហ្នឹងវាអាច ប៉ុន្តែបើគ្រូក្របខ័ណ្ឌវាទាល់តែឆ្លងក្រសួងអប់រំហើយ វាពាក់ព័ន្ធទៅដល់ក្រសួងការបរទេសទៀតនោះ វាទាល់តែឲ្យគេមកទាក់ទងសិន ហើយចាំយើងសុំយោបល់តាមហ្នឹង យើងមិនចេះឲ្យទៅបានទេអាហ្នឹង»។
អង្គការមូលនិធិទ្រទ្រង់អរិយធម៌ខ្មែរ ដែលមានមូលដ្ឋាននៅប្រទេសកម្ពុជា បានឆ្លើយតបតម្រូវការរបស់សមាគមថៃនៅខេត្តសុរិន្ទនោះមុនគេ ដោយឲ្យដឹងថា គេបានបញ្ជូនបុគ្គលិកម្នាក់ទៅកាន់ខេត្តសុរិន្ទរបស់ថៃហើយ ដើម្បីឲ្យជួយបង្រៀនអក្សរខ្មែរដល់គ្រូបង្គោលថៃមួយចំនួន សម្រាប់យកទៅបង្រៀនសិស្សថៃ នៅតាមសាលាជាច្រើនទៀត៕
No comments:
Post a Comment